KEOTAVEN | ຈະໄຂໂຮງໄຟຟ້າພະລັງງານຄວາມຮ້ອນຫົງສາ ຢ່າງເປັນທາງການ ວັນທີ 09 ທັນວາ 2015.

ໃນວັນທີ 09 ທັນວາ 2015 ທີ່ຈະມາເຖິງນີ້ ບໍລິສັດໄຟຟ້າຫົງສາຈໍາກັດ ຈະມີພິທີສະເຫຼີມສະຫຼອງໄຂນໍາໃຊ້ໂຮງໄຟຟ້າພະລັງງານຄວາມຮ້ອນຫົງສາ ແຫ່ງທໍາອິດໃນ ສປປ.ລາວ ທີ່ເມືອງຫົງສາ ແຂວງໄຊຍະບູລີ ແລະ ເພື່ອເປັນການຮ່ວມສະເຫຼີມສະຫຼອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ (02 ທັນວາ 1975-02 ທັນວາ 2015) ເຊິ່ງໂຮງໄຟຟ້າຫົງສາແຫ່ງນີ້ ມີກໍາລັງການຜະລິດກະແສໄຟຟ້າ 1.878 ເມກາວັດ (13.000 ລ້ານໜ່ວຍ/ປີ) ຖືໄດ້ວ່າ ມີກໍາລັງການຜະລິດສຸງສຸດໃນ ສປປ.ລາວ.

…….ເພື່ອເຮັດໃຫ້ຂະບວນການມີຄວາມຟົດຟື້ນມ່ວນຊື່ນ ແລະ ເພື່ອສະແດງນໍ້າໃຈໃຫ້ແກ່ປະຊາຊົນ ທີ່ໃຫ້ຄວາມຮ່ວມມື ແລະ ໃຫ້ການສະໜັບສະໜູນການພັດທະນາໂຄງການມາຕັ້ງແຕ່ຕົ້ນ ດັ່ງນັ້ນ ໃນວັນທີ 24-25 ພະຈິກ 2015 ທີ່ຜ່ານມາ ຄະນະຜູ້ບໍລິຫານຂອງບໍລິສັດໄດ້ຮ່ວມກັບອໍານາດການປົກຄອງເມືອງ ມອບເຄື່ອງທີ່ລະນຶກ ໃຫ້ແກ່ພໍ່ແມ່ປະຊາຊົນ ຊາວເມືອງຫົງສາ ແລະ ເມືອງເງິນ ຈໍານວນ 4.288 ຄອບຄົວ.

…….ຜູ້ບໍລິຫານຂອງບໍລິສັດໄຟຟ້າຫົງສາຈໍາກັດ ໄດ້ໃຫ້ຮູ້ວ່າ ໂຄງການໂຮງໄຟຟ້າປາກບໍ່ແຮ່ຫົງສາ ເປັນໂຄງການທີ່ມີການລົງທຶນມູນຄ່າເຖິງ 3.710 ລ້ານໂດລາສະຫະລັດ ໂຄງການນີ້ ເປັນການຮ່ວມມືທີ່ສຳຄັນລະຫວ່າງປະເທດຄື ລະຫວ່າງ ສປປ.ລາວ ແລະ ຣາຊະອານາຈັກໄທ ເຊິ່ງປະກອບມີ 3 ພາກສ່ວນເປັນຜູ້ຖືຫຸ້ນຄື ລັດວິສາຫະກິດຖືຫຸ້ນລາວ ຖືຫຸ້ນ 20% ບໍລິສັດ ບ້ານປູ ພາວເວີ ຈໍາກັດ (ມະຫາຊົນ) ເຊິ່ງເປັນບໍລິສັດລູກຂອງ ບໍລິສັດບ້ານປູ ຈໍາກັດ (ມະຫາຊົນ) ຖືຫຸ້ນ 40% ແລະ ບໍລິສັດ ອາເອັດຈ໌ ອິນເຕີເນຊັ່ນແນວ (ສິງກະໂປ) ຄໍປໍເຣຊັ່ນ ເຊິ່ງເປັນບໍລິສັດລູກຂອງບໍລິສັດ ຜະລິດໄຟຟ້າ ຣາຊະບູລີ ໂຮນດິງ ຈໍາກັດ (ມະຫາຊົນ) ຖືຫຸ້ນ 40% ນອກຈາກການຜະລິດກະແສໄຟຟ້າທີ່ຂາຍໃຫ້ກັບປະເທດໄທ ແລະ ສ່ວນນຶ່ງນໍາມາຮັບໃຊ້ປະຊາຊົນລາວແລ້ວ ບໍລິສັດໄດ້ປະຕິບັດຕາມກົດໝາຍສິ່ງແວດລ້ອມ ສປປ.ລາວ ແລະ ຂໍ້ກໍານົດຂອງທະນາຄານໂລກຢ່າງເຄັ່ງຄັດ ແລະ ຍັງມີພັນທະສັນຍາໃນການພັດທະນາໂຄງສ້າງພື້ນຖານ ຊີວິດການເປັນຢູ່ ແລະ ສົ່ງເສີມອາຊີບໃຫ້ແກ່ປະຊາຊົນທັງຜູ້ທີ່ຕ້ອງຍົກຍ້າຍໄປຢູ່ໝູ່ບ້ານໃໝ່ ແລະ ປະຊາຊົນທົ່ວທັງເມືອງຫົງສາ ຕະຫຼອດໄລຍະສໍາປະທານ 25 ປີ (2016-2041).