ຂປລ. ໃນວັນທີ 2 ທັນວານີ້ ແມ່ນມື້ເລີກງາມຍາມດີ ຕິດພັນກັບເຫດການສໍາຄັນຂອງຊາດ ທີ່ປະຊາຊົນລາວບັນດາເຜົ່າທົ່ວໜ້າ ສະເຫລີມສະຫລອງວັນສະຖາປະນາ ສປປ ລາວ ຄົບຮອບ 40 ປີ ດ້ວຍບັນຍາກາດເບີກ ບານມ່ວນຊື່ນ ແລະ ຟົດຟື້ນ. ຕອນເຊົ້າມື້ນີ້ ( 2 ທັນວາ 2015 ) ບັນດາການນໍາພວກເຮົາ ແລະ ສປ ຈີນ ໄດ້ໃຫ້ກຽດຮ່ວມກັນວາງສີລາເລີກ ລົງມືກໍ່ສ້າງເສັ້ນທາງລົດໄຟ ລາວ-ຈີນ ຢ່າງເປັນທາງການ ອັນໄດ້ເປັນສັນຍາລັກ ທີ່ມີຄວາມໝາຍຄວາມສໍາຄັນແຫ່ງມິດຕະພາບ, ສາຍພົວພັນ ແລະ ການຮ່ວມມືທີ່ແໜ້ນແຟ້ນ ຍືນຍົງຕະຫລອດໄປ.
ໂຄງການກໍ່ສ້າງເສັ້ນທາງລົດໄຟ ລາວ-ຈີນ ໂຄງການດັ່ງກ່າວບໍ່ພຽງແຕ່ປ່ຽນແປງສະຖານະພາບຂອງ ສປປ ລາວ ຈາກການເປັນປະເທດບໍ່ຕິດກັບທະເລ ມາເປັນປະເທດເຊື່ອມໂຍງເທົ່ານັ້ນ, ແຕ່ຍັງເປັນການເປີດໂສມໜ້າ ແລະ ຍົກລະດັບຊື່ສຽງຂອງປະເທດ ໃຫ້ຊາວໂລກໄດ້ຮູ້ໄດ້ເຫັນ ແລະ ເຂົ້າໃຈຫລາຍຂຶ້ນກວ່າເກົ່າໂດຍຜ່ານການໄປມາຫາສູ່, ແລກປ່ຽນວັດທະນະທໍາ, ການຄ້າ, ການລົງທຶນ, ການບໍລິການ ແລະ ອື່ນໆ ພ້ອມດຽວກັນນັ້ນ ເສັ້ນທາງລົດໄຟ ລາວ-ຈີນ ຈະປະກອບສ່ວນສໍາຄັນ ເຂົ້າໃນການພັດທະນາເສດຖະກິດ-ສັງຄົມ ໃຫ້ມີຄວາມເຂັ້ມແຂງ, ການຂົນສົ່ງສິນຄ້າຈາກພາຍໃນ ແລະ ຕ່າງປະເທດຈະມີຄາລາຖືກລົງ ແລະ ປະຢັດເວລາ, ຈະກະຕຸກຊຸກຍູ້ໃຫ້ຜູ້ປະກອບການ, ຜູ້ລິດສິນຄ້າ ແລະ ຜະລິດກະສິກໍາມີຄວາມຫ້າວຫັນກວ່າເກົ່າ. ແນວໃດກໍຕາມ ເສັ້ນທາງລົດໄຟລາວ-ຈີນ ນີ້ຈະເປັນເສັ້ນທາງລົດໄຟເຊື່ອມຕໍ່ ລະຫວ່າງຂົງເຂດອາຊຽນ ອອກສູ່ໄທ, ມາເລເຊຍ, ສິງກະໂປ ແລະ ເບື້ອງຊາຍແດນບໍ່ເຕັນແຂວງຫລວງນໍ້າທາ ຈະອອກສູ່ ສປ ຈີນ ເຊື່ອມຕໍ່ໃສ່ເສັ້ນທາງສາຍໄໝອອກສູ່ທະວີເອີລົບ.
ໂຄງການກໍ່ສ້າງທາງລົດໄຟມີຄວາມຍາວປະມານ 427 ກິໂລແມັດ, ໂດຍຈະເລີ່ມສ້າງນັບແຕ່ ດ່ານຊາຍແດນ ລາວ-ຈີນ ຢູ່ເຂດບໍ່ເຕັນ ແຂວງ ຫລວງນ້ຳທາ ມາເຖິງນະຄອນຫລວງວຽງຈັນ ຈົນຮອດຈຸດລົດໄຟເຊື່ອມຕໍ່ ລາວ-ໄທ ແຫ່ງໃໝ່, ຈັດຢູ່ໃນປະເພດທາງລົດໄຟມາດຕະຖານລະດັບ 1 ເຊິ່ງມີ ຄວາມກ້ວາງຂອງລາງແມ່ນມາດຕະຖານສາກົນຄື 1.435 ມມ (ມິລິແມັດ) ເປັນປະເພດລາງດ່ຽວ, ຄວາມກ້ວາງດ້ານຂ້າງເສັ້ນທາງລົດໄຟ ເບື້ອງລະ 50 ແມັດ ແລະ ຈະໄດ້ລ້ອມຮົ້ວໄວ້ ເພື່ອຄວາມປອດໄຟ ເຊິ່ງເປັນມາດຕະການສາກົນທີ່ໄດ້ກຳນົດໄວ້, ໂດຍຈະສ້າງເປັນລາງດ່ຽວນຳໃຊ້ຄວບຄູ່ກັນ ລະຫວ່າງ ລົດໄຟຂົນສົ່ງສິນຄ້າທີ່ກຳນົດຄວາມໄວປະມານ 120 ກິໂລແມັດ/ຊົ່ວໂມງ ແລະ ຜູ້ໂດຍສານປະມານ 160 ກິໂລແມັດ ຊົ່ວໂມງ, ໄດ້ອອກແບບສໍາຮອງໄວ້ສໍາລັບຂົນສົ່ງໂດຍສານເຂດທົ່ງພຽງ ຢູ່ເມືອງວັງວຽງ ແຂວງວຽງຈັນ ຫານະຄອນຫລວງວຽງຈັນແມ່ນ 200 ກິໂລແມັດ/ຊົ່ວໂມງ; ເປັນລະບົບຂັບເຄື່ອນດ້ວຍໄຟຟ້າ, ປະກອບມີສະຖານີ 33 ແຫ່ງ ໃນນັ້ນມີສະຖານີ ສໍາລັບຫລີກລົດໄຟ 11 ແຫ່ງ ແລະ ສະຖານນີສິນຄ້າ 1 ແຫ່ງ.
Lao Kip Calculator
